Luk 9 | LpxULB | STEP | Ette inyeja elilloŋu lefahat tomon harik anaboite ette hisio do hosie golon ho dwaran hette galik miniaŋa etilibori iŋweiti.

Luke 9

1 Ette inyeja elilloŋu lefahat tomon harik anaboite ette hisio do hosie golon ho dwaran hette galik miniaŋa etilibori iŋweiti. 2 Ette Yesu ŋaifahak isieja hetiyanari do huwo Obie no Hollum hijo hetilibo haŋwak.

3 Elimak ifa inyeja do hosie hijo, “Baŋa eyari innamuk hirro da mai nyie lifwo itai, ladahat, kullo, imune, arobia ho boŋojin arik. 4 Itolojo da haŋ nyie liwonyie itai many ebusahini itai mai nyie.

5 Ituturok do luha tuduha tara hejek innahatai ille lebo itai hetera a hituhuti do hosie lebusak itai doŋe nyie.” 6 Ette isieja ŋaifie te hiji ho misihi, elima saye inno olibo ojo isieja daŋ etilibo huwo ta maissok aria.

7 Iyane, etiru ifa Erode Mamur lo Tetraka hirro daŋ innafa lowuon, ette inyej ŋuŋusia binno, nyo ojo illamuk hijo aŋaibuhu Yoani Batista to yei, 8 Ette hilak hijo aŋalew Elija, ojo hilak arrasa hijo, enyiak hekilak illafa ho beren ŋaibuhu. 9 Eijo Erode, “Aŋutu ifa naŋ hoo no Yoani, ŋai hidofe le enyiak naŋ hititira hirro innohonyie?” Ette Erode siaha hikoi hijo awak inyie ŋaigonyu Yesu.

10 Ifa acohini lefahat ette isieja ŋailimak do Yesu hirro innafa legiem isieja, ette inyeja ŋeyari honyie isieja abore gala no Bettesaida. 11 Hati ifa etiru iluluŋ no huwo ette ŋejufari inyia, ojo inyia ette efwotu isieja ero do hosie hirro inno Obie no Hollum, etilibo luha illafa lawak liboi.

12 Ifa laŋaswori holoŋ afanu lefahat tomon harik hijo do honyie, “Ifuhak iluluŋ ne amaissok innohosie anyar lofwo arrumu ijotiti innohosie ho nabo daha, nyo ewuon iyohooi inni do itela.” 13 Hati ojo inyeja do hosie, “Isiara do hosie innamuk hirro hettedahai.” Ojo isieja ette hijo, “Ewoun iyohooi he imuneha miet ojo ham arik ija.” Eremik mahu iso iyohooi enyaŋu ŋiria de iluluŋ ne daŋ. 14 Ara ifa huwo nuha alif miet. Ette inyeja hijo do lefahat illohonyie, “Isiara huwo hotohunyie da dau, hotowuana iluluŋ ho tomwana miet hamai.”

15 Ifa ehum lefahat inne daŋ, ohitole huwo daŋ ta fau. 16 Ette inyeja ŋadumu imuniaha miet ho ham arik liya ette hiwolo ahide ido ette hijok isieja, ette hiwur isieja ette hiso de lefahat illohonyie hataharak de iluluŋ. 17 Enya ifa isieja many ofoŋi ette ŋeiduduhak innafa lofitini many enyiak etufutak gufahien tomon harik.

18 To nabo far ifa eno Yesu lomojori hamai, owuon ifa lefahat honyie ette inyeja hifi isieja hijo, “Hojo huwo naŋ ŋai?” 19 Ette isieja hijo, “Iye Yoani Batista, ette hilak hijo Elija, ojo hilak ette hijo lobo hekilak illafa he beren enyiak ŋebuhu.”

20 Hati ette inyeja hijo do hosie “Hati eijoo itai naŋ ŋaiŋ?” Ette Peturu hijo, “Iye Kristo lolotu tara Hollum.” 21 Hati ette Yesu hisor isieja hijo hotobiaŋa elimak lobo tihoni, Ette hijo, no” 22 “Orrumu iso lenyi tihoni hitigema hirro aria, ebo iso huwo illo hitoha, Fadirihien ho hagiorok inyeja, ette ŋatohoi inyeja, ette ŋebuhu to holoŋ hitahunihi.

23 Ette inyeja hijo daŋ do hosie, “Lawak lobo tihoni ŋejufuni naŋ, isiara inyeja hotogwe kwan nohonyie. Hotolororoi Kuruce nohonyie holoŋitek daŋ ette hejufari naŋ. 24 Lawak lobo tihoni hikem hetulwahu manya nohonyie etilitek iso inyeja. Hati leletilitek manya nohonyie te hiram hanaŋ, etilwahini iso inyeja. 25 Holibo hati inyie jai do tihoni laŋarumu inyeja hirro daŋ hunna ta fau, hati ette hetilitek kwan nohonyieŋ

26 Leloriri tihoni naŋ ho hiram hanaŋ, eloriri iso lenyi tihoni inyeja laŋacohini iso inyeja do lohwo nohonyie, ho lohwo no Monye ho anjillohien illo Olibo. 27 Hati elimak naŋ itai dede, owuon ilak illahatai illo loweita inni, illo lobe eremik hinniŋ yei many eigonyu Obie no Hollum.”

28 Da halu ho holoŋitek hotohunik ta nafa erarari Yesu hirro nuhe, ette inyeja eyari daŋ honyie Peturu, Yoani ojo Yakobo, ette ŋeno a doŋe lomojori. 29 Eloito ifa homwoŋ nohonyie, ojo boŋojin innohonyie obwor inno opipiak.

30 Ette ilak huwo lohorik hidwoŋ ille lero ho inyeja! Ara ifa isieja Musa ho Elija, 31 oleyhini ifa isieja to kwetten. Ero ifa isieja heinno nohonyie ŋalew do Yerusalem. Ho hiram nolohu inyeja ŋatubak do Yerusalem.

32 Aŋajetori ifa Peturu binno ho luha illafa lowuon honyie. Hati ifa laŋaceŋu isieja, ette ŋegonyu kwetten nohonyie ojo huwo lohorik loweita ho inyie. 33 Ifa eijo isieja efwo ade tere Yesu, ette Peturu hijo do honyie, “Eittok olibo do hooi ha wuanari inni ko hoi. Eduhok iso iyohooi ticio hunik, naboite do hoi, naboite to Musa ojo naboite de Elija.” Obe ifa inyeja oyien hirro inne lero inyie.

34 Ta nafa harrasa inyeja hiro hirro hunna, ette itiran ŋawoŋ ette ŋeburuhak isia; abaŋi ifa isieja nafa eburuhak itiran isieja. 35 Ottu ifa hiram tara itiran no lojo, “Lenyi hanaŋ Lenyimoto illeŋ. Itira do honyie.” 36 Ifa esaha hiro, ette Yesu wuana hamai. Odwari ifa isieja hirro inne to holoŋitek nuha obe elimak do lobo tihoni hirro innafa egonyu isieja.

37 To moite to nohonyie, ifa lacohini isieja to doŋe aŋolon, ette inyeja hiboŋ he iluluŋ no huwo. 38 Niya, ette lobo tihoni hilulwo to hiji he iluluŋ hijo; “Hetiyanani, ettena naŋ iye, towolo lenyi hanaŋ, ara inyeja hito hanaŋ loboite ija. 39 Ewolo iye, eniefita oyiri no lorru inyeja, kwak many afanini habunak to hutuk nohonyie. Obe lebusuta inyeja do holoŋi, ebusak inyeja to golon, ette hidofe eriafu inyeja no lorru lebusak inyeja. 40 Ettena naŋ de lefahat illohoi hefuhai ade tara honyie, hati obe leriamik.”

41 Ette Yesu hitiraŋ hijo, “Itai hullo obe huruk, hilahaji no hemumunak, haduloi iso naŋ manya hatai many anuŋ? Yani lenyi hoi le inni.” 42 Ta nafa ottuni hito, ette meniaŋa ŋabwarak inyeja da fau ette hefufudok inyeja no lorru. Hati ette Yesu hiriŋ oyiri nafa nebot ette hitilibo oŋeye ette hiso inyeja do money honyie.

43 Eliliha ifa isieja binno to dwaran no Hollum. Ojo isieja harrasa daŋ hililiha to hirro innafa egem inyeja ette inyeja hijo de lefahat illohonyie, 44 “Isiara hirro inne daŋ hotojiŋak do yohe innahatai, nyo esiarahini iso Lenyi tihoni da has ho huwo.” 45 Hati obe ifa isieja oyien hirro inne lero inyeja. Nyo eŋofo ifa tara hosie. Abaŋi ifa isieja hifi inyeja hirro inne lero inyeja.

46 Niya ette isieja arijahini to kwaite innohosie hijo ŋai iso ara eittok do hiji hosie. 47 Hati ifa laheru Yesu higigilita inno tajia innohosie, ette inyeja ŋadumu lobo iŋeye, ette ehumak inyeja to oko ŋhati nohonyie, 48 Ette hijo do hosie, “lefwotu lobo tihoni iŋeye ille hitiŋ iya inna to fure hanaŋ, efwotu iso inyeja naŋ, lefwotu lobo tihoni naŋ, efwotu iso inyeja lie lefahu naŋ. Nyo tihoni lara halu tara hatai daŋ ara iso inyeja leittok da hatai.”

49 Ette Yoani hitiraŋ hijo, “Eittok ewolo iyohooi lobo tihoni efuhiti meniaŋa to fure to nohoi, ette iyohooi hitiwet inyeja nyo obe inyeja ejufutia he iyohooi.” 50 Hati ette Yesu hijo do honyie, “Baŋa etiwet inyeja, nyo tihoni lobe ebo itai ara lahatai.”

51 Ifa eliaha holoŋitek inno lohuye eyari inyeja eno ido, ette inyeja etiyitek homwoŋ nohonyie a Yerusalem. 52 Ette inyeja ŋaifahak efahat illohonyie to hosiere honyie, ofwo isieja ŋajiŋak do doŋe nobo no Samaria anyar efwotu inyeja. 53 Hati ebo ifa huwo nuha efwotu inyeja nyo lawak ifa inyeja eno a Yersulaem.

54 Ifa ewolo hejufutak illohonyie, Yoani ho Yakobo hijo do honyie, “Habu, ibe iye liwak iyohooi helilloŋo him ate ido hetihara isiejaŋ?” 55 Hati oyito Yesu ette hiriŋ isieja. 56 Niya ette isieja ŋaifie a nabo doŋe.

57 Ifa efie isieja te ikoi nohosie eijoo lobo tihoni do honyie, “Ejufari iso naŋ iyye amai nyie lihu iyye.” 58 Ette Yesu hijo do honyie, “Owuon lobeyohi he iwudoho innohosie, ojo cieŋ inne hide owuon ha hajik innohosie, hati obe Lenyi tihoni owuon ha mai ne leriamik hetiferik hoo nohonyie.“

59 Ette inyeja hijo do lobo tihoni, “Ijufuni naŋ.” Hati ojo tihoni le do honyie, “Habu ibusak do a hu naŋ ŋanuhak money hanaŋ.” 60 Hati ette Yesu elimak inyeja, “Ibusak hayoni hotonuhak hayok illohosie, hati inno ilimak da massiok daŋ Obie no Hollum.”

61 Ette lobo tihoni hidofe hijo, “Ejufari iso naŋ iyye, Habu, hati isiara naŋ ahu efonyini isieja luha lowuon da haŋ hanaŋ.” Hati ette Yesu hijo, “Obe lobo ehumak hana nohonyie do kebu ette hiwolo ahalu, leriamu do Obie no Hollu.”